თბილისში უცხოელების ძარცვის საქმეზე ოთხი არასრულწლოვანი დააკავეს

თბილისში, უცხო ქვეყნის მოქალაქეებზე განხორციელებული თავდასხმისა და ძარცვის ფაქტზე, სამართალდამცველებმა ოთხი არასრულწლოვანი დააკავეს. შინაგან საქმეთა სამინისტროს ინფორმაციით, ერთ-ერთი დაკავებული წარსულში უკვე ნასამართლევია.

გამოძიების ვერსიით, არასრულწლოვნები თბილისში თავს დაესხნენ უცხოელ მოქალაქეებს, მიაყენეს მათ ფიზიკური შეურაცხყოფა, რის შემდეგაც მობილური ტელეფონები და სხვა პირადი ნივთები გასტაცეს. დანაშაულის ჩადენის შემდეგ, ბრალდებულები შემთხვევის ადგილიდან მიიმალნენ.

თბილისის პოლიციის დეპარტამენტის ვაკე-საბურთალოს მთავარი სამმართველოს თანამშრომლებმა, ოპერატიული და საგამოძიებო მოქმედებების შედეგად, დამნაშავე პირები ცხელ კვალზე დააკავეს. მოპარული ნივთები ნივთმტკიცებად არის ამოღებული.

საქმეზე გამოძიება სისხლის სამართლის კოდექსის 178-ე მუხლით მიმდინარეობს, რაც წინასწარი შეთანხმებით ჯგუფის მიერ, ძალადობით ჩადენილ ძარცვას გულისხმობს და სასჯელად 8 წლამდე თავისუფლების აღკვეთას ითვალისწინებს.