გომისმთის განაშენიანების გეგმის განხილვა 27 ნოემბერს გაიმართება: მოქალაქეები პასუხებს ელოდებიან

ოზურგეთის მუნიციპალიტეტის მერია საზოგადოებას აცნობებს, რომ დაბა გომისმთის განაშენიანების გეგმასთან დაკავშირებული მორიგი საჯარო განხილვა 27 ნოემბერს, 14:00 საათზე გაიმართება. შეხვედრის მთავარი თემა განაშენიანების გეგმის სტრატეგიული გარემოსდაცვითი შეფასების ანგარიში და სტრატეგიული დოკუმენტის პროექტი იქნება.

აღსანიშნავია, რომ მსგავსი შეხვედრა მიმდინარე წლის 24 ივლისსაც იყო დაგეგმილი, თუმცა მაშინ მოქალაქეების მაღალი ინტერესისა და კონკრეტული მოთხოვნების გამო, განხილვა სრულფასოვნად ვერ შედგა.

წინა შეხვედრაზე მისულ მოსახლეობას მოლოდინი ჰქონდა, რომ საუბარი გომისმთაზე მიწების დაკანონების მრავალწლიან პრობლემასა და კურორტზე არსებული სხვა აქტუალური საკითხების გადაჭრას შეეხებოდა. თუმცა, მომხსენებელმა გამოსვლა განაშენიანების გარემოზე ზემოქმედების შეფასებით დაიწყო, რამაც დარბაზში უკმაყოფილება გამოიწვია. მოქალაქეები პასუხებს ითხოვდნენ მათთვის პრიორიტეტულ პრობლემებზე.

„ადამიანები დღემდე ელოდებიან გენერალური გეგმის დამტკიცებას. ასე გაგრძელება შეუძლებელია – ხალხი იტანჯება და მოტყუებული რჩება“, – განაცხადა შაკო ჩანქსელიანმა ივლისის შეხვედრაზე, რომელიც საბოლოოდ ჩაიშალა.

მხარეები მაშინ შეთანხმდნენ, რომ მომდევნო შეხვედრაზე, რომელიც აგვისტოს ბოლოს ან სექტემბრის დასაწყისში უნდა გამართულიყო, მოქალაქეებისთვის მნიშვნელოვან საკითხებსაც დაუთმობდნენ დროს. ახლა კი, 27 ნოემბრის განხილვა ამ დაპირების შესრულების მოლოდინს აჩენს.