უკრაინის გენშტაბი - რუსებმა ოლეშკის მიმდებარე ტერიტორიაზე ცეცხლის შეწყვეტის რეჟიმი პოზიციების გასამყარებლად გამოიყენეს

02.11.2026 / 10:05

უკრაინის გენშტაბი - რუსებმა ოლეშკის მიმდებარე ტერიტორიაზე ცეცხლის შეწყვეტის რეჟიმი პოზიციების გასამყარებლად გამოიყენეს

უკრაინის გენერალური შტაბის განცხადებით, რუსებმა ხერსონის ოლქის დროებით ოკუპირებული ქალაქის, ოლეშკის მიმდებარე ტერიტორიაზე ცეცხლის შეწყვეტის რეჟიმით ისარგებლეს, რათა თავიანთი ქვედანაყოფების როტაცია მოეხდინათ, პოზიციები გაეძლიერებინათ, გზებზე დრონების საწინააღმდეგო დაცვა გაეძლიერებინათ და ლოგისტიკა გაეზარდათ.

„ოლეშკიში ჰუმანიტარული ოპერაციისთვის დაწესებული ცეცხლის შეწყვეტის ფარგლებში, უკრაინის თავდაცვის ძალების ქვედანაყოფებმა უზრუნველყვეს ცეცხლის შეწყვეტა და მხოლოდ მიღწეული შეთანხმებების ფარგლებში მოქმედებდნენ. თუმცა, მტერმა ჰუმანიტარული პაუზა თავისი პოზიციების გასაძლიერებლად გამოიყენა. ცეცხლის შეწყვეტის დროს დაფიქსირდა რუსული ქვედანაყოფების როტაცია, პოზიციების გაძლიერება, გზებზე დრონების საწინააღმდეგო დაცვის გაფართოება და ლოგისტიკის, მათ შორის საბრძოლო მასალის მიწოდების ზრდა“, - აღნიშნულია გენშტაბის განცხადებაში.

გენერალურმა შტაბმა ასევე ხაზგასმით აღნიშნა, რომ ჰუმანიტარული ოპერაციის დროს „ცეცხლის შეწყვეტის რეჟიმის“ დაცვის წყალობით, ჰუმანიტარული ტვირთი დანიშნულების ადგილზე მიიტანეს და უკრაინელები, რომლებმაც ოლეშკის დატოვების სურვილი გამოთქვეს, უკრაინის მიერ კონტროლირებად ტერიტორიაზე დაბრუნდნენ.

შეგახსენებთ, ოლეშკიში ცეცხლის შეწყვეტის რეჟიმი 27 ოქტომბერს ამოქმედდა და 1-ელ ნოემბრამდე გაგრძელდა.