ზელენსკი: ოქტომბერში რუსეთმა 54 400 სამხედრო დაკარგა – ყველაზე მაღალი მაჩვენებელი ომის დაწყებიდან

უკრაინის პრეზიდენტის, ვოლოდიმირ ზელენსკის განცხადებით, გასული თვე რუსეთისთვის უკრაინაში სრულმასშტაბიანი ომის დაწყებიდან ყველაზე სისხლიანი აღმოჩნდა. ოქტომბრის განმავლობაში რუსეთის არმიამ 54 400 ჯარისკაცი დაკარგა, რომლებიც დაიღუპნენ ან მძიმედ დაიჭრნენ.

ზელენსკიმ ასევე ხაზი გაუსვა უკრაინის თავდაცვის ძალების წარმატებებს ტერიტორიების გათავისუფლების კუთხით. ოქტომბერში უკრაინელმა სამხედროებმა 96.2 კვადრატული კილომეტრი დაიბრუნეს, რაც 10.4 კვადრატული კილომეტრით აღემატება იმ ტერიტორიას, რომელიც რუსულმა ძალებმა იმავე პერიოდში დაიკავეს.

უკრაინის ლიდერმა აღნიშნა, რომ რუსეთი მნიშვნელოვან დანაკარგებს განიცდის, მაშინ როცა უკრაინა საკუთარ პოზიციებს ინარჩუნებს და ტერიტორიებს ათავისუფლებს. მისი თქმით, კიევის მიზანია, ომის ყოველი დღე აგრესორისთვის მაქსიმალურად ძვირი დაჯდეს. ზელენსკიმ ხაზგასმით აღნიშნა, რომ ამ „გიჟური დანაკარგების“ შესაჩერებლად რუსეთს მხოლოდ ცეცხლის შეწყვეტა და დიპლომატიური მოლაპარაკებები სჭირდება.

უკრაინის შეიარაღებული ძალების გენერალურმა შტაბმა ოკუპანტების ოქტომბრის დანაკარგების მასშტაბი ვიზუალური შედარებებით წარმოადგინა. მათი შეფასებით, დაღუპული და დაჭრილი რუსი სამხედროების რაოდენობა დაახლოებით ჩუკოტკის ავტონომიური ოკრუგის მთელ მოსახლეობას უტოლდება. ასევე, ეს მაჩვენებელი შეიძლება შედარდეს წითელ მოედანზე გამართულ ცხრა სამხედრო აღლუმს ან მოსკოვის მეტროს დაახლოებით 200 ვაგონს.