„ლანჩხუთს“ ჩაშლილ მატჩში წაგება ჩაეთვალა: კლუბი პოზიციას არ ცვლის

საქართველოს ფეხბურთის ფედერაციის სადისციპლინო კომიტეტმა ქალთა საფეხბურთო კლუბ „ლანჩხუთს“ ტექნიკური წაგება ჩაუთვალა „ნიკე-ლუსოსთან“ 29 სექტემბერს არშემდგარ მატჩში. ეს გადაწყვეტილება კლუბის მიერ ოფიციალურად დადასტურდა.

აღნიშნული შეხვედრა ქალთა ეროვნული ჩემპიონატის ფარგლებში უნდა გამართულიყო, თუმცა „ლანჩხუთის“ ფეხბურთელებმა პროტესტის ნიშნად უარი განაცხადეს თამაშის გაგრძელებაზე და მოედანი დატოვეს.

მატჩის დაწყებამდე გუნდმა მოედანზე გაშალა ბანერი, რითაც ძალადობა დაგმო. პროტესტის მიზეზი გახდა „ნიკე-ლუსოს“ ყოფილი ხელმძღვანელის მიმართ სექსუალური ძალადობის ბრალდების საქმე, ასევე ორ კლუბს შორის მანამდე არსებული დაპირისპირება.

შეგახსენებთ, რომ „ნიკე-ლუსოს“ ყოფილი ხელმძღვანელი სასამართლომ წარდგენილ ბრალდებაში გაამართლა. თავის მხრივ, „ნიკე-ლუსომ“ კატეგორიულად უარყო „ლანჩხუთის“ მიერ გავრცელებული ბრალდებები და მათ ცილისმწამებლური უწოდა.

მიუხედავად სადისციპლინო კომიტეტის მკაცრი გადაწყვეტილებისა, „ლანჩხუთი“ აცხადებს, რომ თავის პოზიციას არ გადახედავს. კლუბის წარმომადგენლების განცხადებით, მათ ესმით ჩემპიონობის შანსის დაკარგვის შესაძლებლობა, თუმცა მიიჩნევენ, რომ შექმნილ ვითარებაში ძალადობის წინააღმდეგ აქტიური პოზიციის დაფიქსირება ერთადერთი სწორი არჩევანია, რომელსაც ალტერნატივა არ აქვს.

აღსანიშნავია, რომ 29 სექტემბრის შეხვედრას ჩემპიონობისთვის ბრძოლაში გადამწყვეტი მნიშვნელობა ჰქონდა. იმ დროისთვის „ნიკე-ლუსოს“ 63 ქულა ჰქონდა დაგროვებული, ხოლო „ლანჩხუთს“ – 60. ამ შედეგით, „ლანჩხუთის“ პოზიცია სატურნირო ცხრილში მნიშვნელოვნად გაუარესდა.

მიუხედავად ამ ინციდენტისა და მიღებული სანქციისა, ლანჩხუთელი ფეხბურთელები ეროვნულ ჩემპიონატში ასპარეზობას ჩვეულ რეჟიმში აგრძელებენ. მომდევნო მატჩს „ლანჩხუთი“ 3 ნოემბერს, თბილისში, „კვარტალის“ წინააღმდეგ გამართავს. თამაში ნუცუბიძის საფეხბურთო ცენტრში, 14:30 საათზე დაიწყება. კლუბი მოუწოდებს გულშემატკივრებს, დაესწრონ შეხვედრას და მხარი დაუჭირონ გუნდს.