ეროსი მანჯგალაძის ლეგენდარული პენალტი: როგორ აქცია დიდმა მსახიობმა ფეხბურთი კომედიად

ქართული თეატრისა და კინოს ლეგენდარული მსახიობების, ეროსი მანჯგალაძისა და იპოლიტე ხვიჩიას გამოჩენა საფეხბურთო მატჩებზე ყოველთვის განსაკუთრებულ სანახაობას ქმნიდა. მათი ქარიზმა და იუმორი მოედანზეც კი ახერხებდა მაყურებლის მოხიბვლას, რის გამოც ფეხბურთის თამაში ხშირად მხიარულ თეატრალურ წარმოდგენად გარდაიქმნებოდა ხოლმე. ამ ეპოქის ერთ-ერთ საინტერესო ისტორიას ბატონი სოსო ლაღიძე იხსენებდა.

მისი მონათხრობით, ერთხელ ქუთაისში ადგილობრივი თეატრის გუნდს დაუპირისპირდნენ. ეს შეხვედრები ისეთივე ინტერესს იწვევდა, როგორც მაშინდელი დიდი საფეხბურთო დაპირისპირებები. მატჩი დაძაბული გამოდგა და ძირითადი დროის დასრულებამდე ორი წუთით ადრე ანგარიში 4:4 იყო. თბილისელები გადამწყვეტ შეტევაზე გადავიდნენ, ქუთაისელთა კართან ნამდვილი ქარიშხალი დაატრიალეს და საბოლოოდ, მათ სასარგებლოდ პენალტი დაინიშნა.

ასეთ კრიტიკულ მომენტში ბურთთან მისვლას ბევრი მოერიდა, მაგრამ ინიციატივა ეროსი მანჯგალაძემ იკისრა. თანაგუნდელები სიამოვნებით დათანხმდნენ. ეროსიმ ბურთი პენალტის ნიშნულზე დადო, მსაჯის ნებართვის შემდეგ კი უჩვეულო რაზგონის ასაღებად მოემზადა. მაყურებელი გაკვირვებული უყურებდა, როგორ შეტრიალდა მსახიობი და საკუთარი კარის მიმართულებით დაიწყო სვლა. ნაბიჯ-ნაბიჯ, მან 24 ნაბიჯი გადადგა, რამაც თანაგუნდელებშიც კი გააჩინა შეკითხვები: „სად მიდის ეს კაცი? ხომ არ დაავიწყდა, რომ პენალტი აქვს დასარტყმელი?!“

ოცდაოთხი ნაბიჯის შემდეგ, ეროსი მოულოდნელად, ისეთი ჟინით შემობრუნდა ბურთისკენ, რომ ქუთაისელთა მეკარეს გული კინაღამ გაუსკდა. ამ ხვანცალ-ხვანცალში ბურთამდე მიაღწია, დაარტყა და... დარტყმული ბურთი პირდაპირ კუთხურის ალმისკენ გაფრინდა, ოდნავ აცდა იქ მდგარ ფოტოკორესპონდენტს. ამის შემდეგ მსაჯის სასტვენიც გაისმა და მატჩი ფრედ, 4:4 დასრულდა.

მოედანი ეროსიმ თავდახრილმა დატოვა, ხმა არ ამოუღია. მხოლოდ გასახდელიდან გამოსვლის შემდეგ ამოთქვა: „არა, სოსო, არა... მე ამის შემდეგ ფეხბურთელს როგორ გავამტყუნებ! რა ვქენი, ეს, ა?!“ ეს ინციდენტი იმდენად მძიმედ განიცადა დიდმა მსახიობმა, რომ მოედანზე სათამაშოდ აღარასდროს გამოსულა. ფეხბურთისადმი თავის სიყვარულს მას შემდეგ მხოლოდ კომენტატორობით იკმაყოფილებდა.