3 გზა პროფესიული გადაწვისგან თავის დასაცავად | Marketer

სამუშაო დატვირთვა, მუდმივი სტრესი და დასვენებისთვის არასაკმარისი დრო პროფესიული გადაწვის ერთ-ერთი მთავარი წინაპირობაა. ამ მდგომარეობამ შესაძლოა გავლენა მოახდინოს არა მხოლოდ სამუშაო პროდუქტიულობაზე, არამედ ადამიანის განწყობაზე, ძილის ხარისხსა და პირად ურთიერთობებზეც.

ფსიქოლოგებისა და მკვლევრების ყურადღება სულ უფრო მეტად ეთმობა ყოველდღიურ ჩვევებს, რომლებიც სტრესის შემცირებასა და გადაწვის პრევენციაში გვეხმარება. ისინი სამ პრაქტიკულ სტრატეგიას გამოყოფენ, რომელთა დანერგვაც ყოველდღიურ რუტინაში რთული საერთოდ არ არის.

დღე დაიწყეთ სეირნობით

დილის მზის სხივები ორგანიზმს ცირკადული რიტმის, ანუ ძილ-ღვიძილის ციკლის რეგულირებაში ეხმარება. ბუნებრივ სინათლესთან კონტაქტი დილით კორტიზოლის ნორმალურ მატებას უწყობს ხელს, რაც სიფხიზლესა და კონცენტრაციას აუმჯობესებს. რეგულარული ფიზიკური აქტივობა კი სტრესის შემცირებასა და ღამის ძილის ხარისხის გაუმჯობესებას უკავშირდება.

ამიტომ სასარგებლოა, სამუშაო დღის დაწყებამდე რამდენიმე წუთი დილის გასეირნებას დაუთმოთ.

დილა და საღამო ტელეფონის გარეშე გაატარეთ

გაღვიძებისთანავე ტელეფონის შემოწმება და ძილის წინ ეკრანთან დიდი დროის გატარება ძილის რეჟიმსა და განწყობაზე უარყოფითად მოქმედებს. განსაკუთრებით პრობლემურია დილით საწოლიდან ადგომამდე სამუშაო წერილების, შეტყობინებებისა და სიახლეების გაცნობა, რაც დღის დასაწყისშივე ზრდის დაძაბულობას.

ამ ჩვევის შესაცვლელად რეკომენდებულია ტელეფონის საძინებლის გარეთ დატოვება და მისი გამოყენების გადადება დილის გასეირნების შემდეგ. საღამოს კი, სასურველია, დაძინებამდე ეკრანთან ურთიერთობა შეზღუდოთ.

ყურადღება მიაქციეთ კვების რაციონს

კვებასაც მნიშვნელოვანი როლი აქვს სტრესისა და პროფესიული გადაწვის პრევენციაში. ერთ-ერთი კვლევის თანახმად, ჯანდაცვის სფეროს იმ თანამშრომლებს, რომლებიც საკვები ნივთიერებებით მდიდარ პროდუქტებს მოიხმარდნენ, გადაწვის უფრო დაბალი მაჩვენებელი ჰქონდათ.

სპეციალისტები განსაკუთრებით გამოყოფენ ხმელთაშუაზღვისპირულ დიეტას, რომელიც ბოსტნეულს, პარკოსნებსა და ზეითუნის ზეთს მოიცავს, ხოლო შაქრისა და ცხოველური ცხიმების მოხმარებას ზღუდავს. ასევე რეკომენდებულია ყოველდღიურად ხილისა და ბოსტნეულის რამდენიმე ულუფის მიღება. კვლევამ აჩვენა, რომ ამ კვების რეჟიმის დაცვა პროფესიული გადაწვის რისკის შემცირებასთან იყო დაკავშირებული.

სტატიაში განხილული მიდგომების ეფექტიანობის საილუსტრაციოდ ერთი პაციენტის მაგალითს მოვიყვანთ: სამუშაო სტრესით გამოწვეული შფოთვისა და ძილის პრობლემების მქონე ადამიანმა სამივე რეკომენდაცია ყოველდღიურ ცხოვრებაში დანერგა. სამი კვირის შემდეგ მან განწყობის, კონცენტრაციისა და ფიზიკური მდგომარეობის გაუმჯობესება შენიშნა.

ერთი სიტყვით, პროფესიული გადაწვა საქმიანი ადამიანებისთვის ჩვეულებრივი მოვლენაა და მისი პრევენცია მხოლოდ სამუშაო დატვირთვის შემცირებას არ გულისხმობს. ყოველდღიურ რუტინაში მცირე ცვლილებებსაც შეუძლია მნიშვნელოვანი გავლენა მოახდინოს ადამიანის კეთილდღეობაზე. ამასთან, ხანგრძლივი დაღლილობისა და მსგავსი სიმპტომების შემთხვევაში მნიშვნელოვანია ჯანმრთელობის მდგომარეობის შემოწმებაც, რადგან ზოგჯერ მას ფიზიკური პრობლემებიც იწვევს.