მუკეშ ამბანიმ აზიის უმდიდრესი ადამიანის სტატუსი დაიბრუნა

ფოტო: REUTERS/Niharika Kulkarni

ინდოეთის ყველაზე ძვირადღირებული კომპანიის, Reliance Industries-ის თავმჯდომარემ და მმართველმა დირექტორმა, მუკეშ ამბანიმ, აზიის უმდიდრესი ადამიანის სტატუსი დაიბრუნა. კომპანიის აქციების ფასის თითქმის 12%-იანი მატების შედეგად, ინდოელი მილიარდერის ქონება ერთ დღეში $8.5 მილიარდით გაიზარდა.

Forbes-ის განახლებადი რეიტინგის თანახმად, ამბანის ქონება 10.5%-ით გაიზარდა და $88.8 მილიარდს მიაღწია. ამ ერთდღიანი მატების შედეგად ამბანიმ ByteDance-ის თანადამფუძნებელს, ჭანგ იიმინგს, გადაასწრო, რომლის ქონებაც $84 მილიარდადაა შეფასებული. მოგვიანებით ამბანის ქონება მცირედით კიდევ გაიზარდა და $88.9 მილიარდს მიაღწია. Forbes-ის მილიარდერების გლობალურ რეიტინგში ის ამჟამად 22-ე პოზიციაზეა.

Reliance Industries-ის აქციების ფასების მკვეთრი ზრდა კომპანიის ფინანსურ შედეგებს უკავშირდება. ორშაბათს Reliance Industries-ის საბაზრო ღირებულება $19 მილიარდზე მეტით გაიზარდა მას შემდეგ, რაც ცნობილი გახდა, რომ კვარტალურმა შემოსავლებმა ანალიტიკოსთა პროგნოზებს გადააჭარბა.

ინდური კომპანიის შემოსავალმა 255.5 მილიარდი ინდური რუპია, დაახლოებით $2.7 მილიარდი შეადგინა. შედარებისთვის, ანალიტიკოსები 213.67 მილიარდი რუპიის, დაახლოებით $2.3 მილიარდის, მიღებას პროგნოზირებდნენ.

Reliance Industries-ის აქციების ზრდას წინ უძღოდა ამბანის კონტროლქვეშ მყოფი შვილობილი კომპანიის, Jio Platforms-ის, წარმატებული IPO-ც. ოქტომბრის ბოლოს მუმბაის საფონდო ბირჟაზე დალისტული Jio Platforms-ის აქციების ფასი პირველივე დღეს 27%-ით გაიზარდა. Jio Platforms-ის IPO ინდოეთის ისტორიაში ყველაზე მსხვილ საფონდო დებიუტად იქცა. კომპანიამ აქციების პირველადი საჯარო განთავსებისას $3.2 მილიარდი მოიზიდა, რის შედეგადაც მისმა ღირებულებამ $106 მილიარდს მიაღწია. ცნობისთვის, Reliance Industries-ი კომპანიაში დაახლოებით 66%-იან წილს ფლობს.

რაც შეეხება Reliance Industries-ს, კომპანიის საბაზრო ღირებულება $187.39 მილიარდს უტოლდება და ის საბაზრო კაპიტალიზაციით ინდოეთის უმსხვილესი და მსოფლიოს 101-ე უმსხვილესი კომპანიაა.