პროკურატურამ 19 პირს ბიუჯეტისთვის 545 ათასი ლარის ზიანის მიყენებისთვის ბრალი წაუყენა

საქართველოს პროკურატურამ მასშტაბური თაღლითური სქემის გამოვლენის შემდეგ, სახელმწიფო ბიუჯეტისთვის 545 ათას ლარზე მეტი ზიანის მიყენების ფაქტზე, 19 პირს, მათ შორის უცხო ქვეყნის მოქალაქეებს, ბრალი წარუდგინა.

ფინანსთა სამინისტროს საგამოძიებო სამსახურის ქვემო ქართლის რეგიონული სამმართველოს მიერ ჩატარებულმა გამოძიებამ დაადგინა, რომ ორგანიზებული ჯგუფის წევრები, პირადი ანგარების მიზნით, ბოლო პერიოდში საზღვარგარეთიდან შემოყვანილ 138 ერთეულ ავტომობილს ყალბი დოკუმენტების გამოყენებით ფიქტიურად რეექსპორტის რეჟიმში ათავსებდნენ. ამის მიუხედავად, ავტომობილები საქართველოდან კანონით დადგენილ ვადაში არ გაჰყავდათ.

აღნიშნული უკანონო ქმედებების შედეგად, ორგანიზებულმა ჯგუფმა თავი აარიდა სახელმწიფოსთვის სავალდებულო გადასახადების გადახდას, რითაც სახელმწიფო ბიუჯეტს ჯამში 545 165 ლარის ოდენობის ზიანი მიაყენა.

ბრალდებულებს ბრალი წარედგინათ საქართველოს სისხლის სამართლის კოდექსის 185-ე მუხლის მე-3 ნაწილის „ა” და „ბ” ქვეპუნქტებით (ქონებრივი დაზიანება მოტყუებით, ჩადენილი ორგანიზებული ჯგუფის მიერ დიდი ოდენობით) და 210-ე მუხლის მე-2 ნაწილის „ა” ქვეპუნქტით (ყალბი ქონებრივი უფლებამოსილების დამადასტურებელი დოკუმენტის დამზადება გამოყენების მიზნით და გამოყენება, ჩადენილი ჯგუფურად). ასევე, რამდენიმე პირს ბრალი დანაშაულში დახმარების მუხლებითაც წაუყენეს (სსკ-ის 25.185-ე მუხლის მე-3 ნაწილის „ა” და „ბ” ქვეპუნქტები და 25.210-ე მუხლის მე-2 ნაწილის „ა” ქვეპუნქტი).

ჩადენილი დანაშაულები სასჯელის სახედ 4-დან 7 წლამდე თავისუფლების აღკვეთას ითვალისწინებს. პროკურატურის შუამდგომლობის საფუძველზე, სასამართლომ ბრალდებულებს უკვე შეუფარდა აღკვეთის ღონისძიება.