მიგრაციის დეპარტამენტმა საქართველოში უკანონოდ მყოფი 61 უცხოელი დააკავა

საქართველოს შინაგან საქმეთა სამინისტროს მიგრაციის დეპარტამენტმა ქვეყნის მასშტაბით ჩატარებული სპეციალური საიმიგრაციო კონტროლის ღონისძიებების შედეგად, საქართველოში უკანონოდ მყოფი 61 უცხო ქვეყნის მოქალაქე დააკავა.

უწყების ცნობით, კომპლექსური ოპერაცია სხვადასხვა დანიშნულების ობიექტებზე განხორციელდა. შემოწმებისას გამოვლინდა პირები, რომლებიც „უცხოელთა და მოქალაქეობის არმქონე პირთა სამართლებრივი მდგომარეობის შესახებ“ საქართველოს კანონით დადგენილ მოთხოვნებს არღვევდნენ.

დაკავებულთა შორის არიან ტაილანდის, აზერბაიჯანის, თურქეთის, რუსეთის, ბელარუსის, იორდანიის, ჩინეთის, უზბეკეთის და თურქმენეთის მოქალაქეები.

ამ დროისთვის, ყველა დაკავებული მიგრაციის დეპარტამენტის დროებითი განთავსების ცენტრშია მოთავსებული. შინაგან საქმეთა სამინისტრო აცხადებს, რომ მიმდინარეობს შესაბამისი პროცედურები მათი საქართველოდან გაძევებისთვის.