შეიარაღებულმა პირმა კრაკოვის მთავარ მოედანზე ოთხი ქალი და ორი კაცი მოკლა

შეიარაღებულმა პირმა, რომელიც მანქანიდან უმისამართოდ ისროდა, პოლონეთის ქალაქ კრაკოვის მთავარ მოედანზე ოთხი ქალი და ორი მამაკაცი მოკლა. ამის შემდეგ პოლიციამ ეჭვმიტანილს ესროლა და დააკავა.

დაიჭრა კიდევ თხუთმეტი ადამიანი, მათ შორის ორი პოლიციელი, რომლებიც ეჭვმიტანილთან ორმხრივი სროლისას დაშავდნენ. ერთ-ერთი მათგანის მდგომარეობა მძიმეა. პოლიციის ცნობით, ეჭვმიტანილს ეცვა “სამხედრო სტილის” ტანსაცმელი და შეიარაღებული იყო სამხედრო იარაღით.

პოლიციის განცხადებით, შეიარაღებული პირი პოლონეთის 24 წლის მოქალაქეა.

პოლიციის ცნობით, დაახლოებით 15:00 საათზე დაიწყეს შეტყობინებების მიღება იმის შესახებ, რომ თავდამსხმელმა მანქანიდან ცეცხლი გახსნა და უმისამართოდ ესროდა ხალხს პოლონეთის სიდიდით მეორე ქალაქის მოედანზე, რომელიც პოპულარული ტურისტული ადგილია.

“როიტერსის” ცნობით, სოციალურ მედიაში გავრცელებულ გადაუმოწმებელ კადრებში ჩანდა, თუ როგორ გარბოდა ხალხი შემთხვევის ადგილიდან, რა დროსაც ისმოდა სროლისა და პოლიციის სირენების ხმა. სხვა ვიდეოში ჩანდა სისხლიან ქვაფენილზე მწოლიარე ორი ადამიანი და გამვლელები, რომლებიც მათ რეანიმაციას ცდილობდნენ. მესამე ადამიანი იქვე, მიწაზე უძრავად იწვა.

„დავინახე, რომ მძღოლის ფანჯრიდან ისროდნენ და კვამლი გამოდიოდა. მე გავიქეცი მთავარ ბაზრის მოედანზე მდებარე პოლიციის განყოფილებისკენ; როდესაც შიგნით შევვარდი, იქაურობა სავსე იყო იატაკზე დამალული ხალხით“, – განუცხადა საინფორმაციო ვებსაიტ Interia-ს მამაკაცმა, რომელმაც საკუთარი თავი კონრადად წარადგინა და სროლის თვითმხილველი იყო.

67 წლის მამაკაცმა, სახელად იულეკმა, Reuters-ს განუცხადა, რომ მან დაინახა როგორ მოულოდნელად გამოჩნდა მუქი ფერის მანქანა, რის შემდეგაც მძღოლმა ადამიანთა ჯგუფს ესროლა და ადგილიდან მიიმალა.

„ორი წუთით ადრე რომ ვყოფილიყავით იქ, შესაძლოა ჩვენთვისაც ესროლათ“, – თქვა მან.

ადგილობრივი პოლიციის სპიკერმა, კატაჟინა ჩისლომ განაცხადა: „მსროლელს სამხედრო სტილის ტანსაცმელი ეცვა და იყენებდა სამხედრო იარაღს. მის მანქანაში ასევე ნაპოვნია დიდი რაოდენობით იარაღი და საბრძოლო მასალა.“

პოლიციის სპიკერმა ანჯეი ფიოლეკმა კერძო მაუწყებელ TVN 24-ს განუცხადა, რომ თავდამსხმელმა გამოიყენა AR-15 ტიპის შაშხანა და მას ცეცხლსასროლი იარაღის ტარების ლიცენზია ჰქონდა.

პორტუგალიის საგარეო საქმეთა სამინისტრომ განცხადებაში აღნიშნა, რომ დაშავებულებს შორის პორტუგალიელი ქალიცაა, რომელიც საავადმყოფოში იმყოფება, თუმცა დამატებითი დეტალები არ დაუკონკრეტებიათ.

უკრაინის პრეზიდენტმა ვოლოდიმირ ზელენსკიმ სროლას „შოკისმომგვრელი“ უწოდა. „უკრაინელი ხალხის და პირადად ჩემი სახელით, გულწრფელ სამძიმარს ვუცხადებ დაღუპულთა ოჯახებსა და ახლობლებს“, – დაწერა მან X-ზე.

ევროპის საგარეო პოლიტიკის ხელმძღვანელმა კაია კალასმა მას უწოდა „ტრაგედია, რომელიც პოლონეთის საზღვრებს მიღმაც შორს იგრძნობა“.