ლანჩხუთი: ჩემპიონობასაც კი დავთმობთ, თუ ძალადობის წინააღმდეგ პროტესტით მოვიპოვებთ – კლუბის მტკიცე პოზიცია

ქალთა საფეხბურთო კლუბი „ლანჩხუთი“ მტკიცედ განაგრძობს პროტესტს და უარს აცხადებს „ნიკე-ლუსოსთან“ თამაშზე. კლუბის განმარტებით, ეს გადაწყვეტილება მიზნად ისახავს ძალადობის წინააღმდეგ ხმის ამაღლებას და ის არ შეიცვლება, სანამ შესაბამის ფაქტებზე სათანადო რეაგირება არ მოხდება.

„ლანჩხუთის“ მიერ გავრცელებულ განცხადებაში ნათქვამია, რომ მათთვის „ნიკე-ლუსოსთან“ მატჩის გამართვა ძალადობის ნორმალიზაციას და, თუნდაც ირიბად, მის მხარდაჭერას ნიშნავს. „სანამ ძალადობა სათანადო რეაგირების გარეშე რჩება, ჩვენი გადაწყვეტილება უცვლელი იქნება“, _ აცხადებს კლუბი.

კლუბი ასევე ეხმაურება საზოგადოებაში გავრცელებულ მოსაზრებას, თითქოს მათი პროტესტის რეალური მიზანი მთავარი მეტოქის დისკვალიფიკაციის გზით ჩემპიონობის მოპოვებაა. „ლანჩხუთი“ ამგვარ შეფასებას უსაფუძვლოს უწოდებს და ხაზგასმით აღნიშნავს, რომ მხოლოდ საფეხბურთო მოედანზე, პატიოსანი ბრძოლით მოპოვებულ გამარჯვებას აღიარებს.

განცხადებაში ნათქვამია, რომ თუ „ნიკე-ლუსოს“ მიმართ სანქციების დაწესების შედეგად „ლანჩხუთი“ საქართველოს ჩემპიონი გახდება, გუნდი ოფიციალურად იტყვის უარს ამ ტიტულზე. ამასთან დაკავშირებით, ისინი საქართველოს ფეხბურთის ფედერაციას შესაბამისი გადაწყვეტილების მიღების მოთხოვნით მიმართავენ.

„როდესაც სასწორზე დგას სექსუალური ძალადობის საქმეში დაზარალებული გოგონას უფლებები, ღირსება და მომავალი, ნებისმიერი სპორტული ტიტული მეორეხარისხოვანია“, _ განმარტავს კლუბი. მათი მიზანია დაზარალებულის მხარდაჭერა ყველა შესაძლო საშუალებით და ისეთი საფეხბურთო გარემოს შექმნა, სადაც თითოეული ადამიანი თავს უსაფრთხოდ იგრძნობს და მისი ღირსება დაცული იქნება.

„ლანჩხუთი“ ხაზგასმით აღნიშნავს, რომ სხვა გუნდებს ანალოგიური პროტესტისკენ არ მოუწოდებს. მათი აზრით, მსგავსი გადაწყვეტილების მიღება თითოეული კლუბისა და ფეხბურთელის ინდივიდუალური უფლებაა.

შეგახსენებთ, რომ 29 სექტემბერს „ლანჩხუთმა“ „ნიკე-ლუსოსთან“ მატჩის გაგრძელებაზე უარი განაცხადა, რის შედეგადაც საქართველოს ფეხბურთის ფედერაციის სადისციპლინო კომიტეტმა მათ ტექნიკური წაგება ჩაუთვალა. პროტესტი დაკავშირებულია „ნიკე-ლუსოს“ ყოფილი პრეზიდენტის, მეჰმეთ უიარის მიმართ სექსუალური ძალადობის ბრალდებით მიმდინარე საქმესთან. თბილისის საქალაქო სასამართლომ უიარი პირველი ინსტანციის განაჩენით გაამართლა, ხოლო „ნიკე-ლუსომ“ „ლანჩხუთის“ მიერ გავრცელებული ბრალდებები უარყო.

კლუბის განცხადებით, მიმდინარე პროტესტი არ შეეხება სხვა გუნდებთან შეხვედრებს. „ლანჩხუთი“ მომდევნო მატჩს ხვალ, 8 ნოემბერს, 14:00 საათზე, ბათუმში, ანგისას საფეხბურთო ბაზაზე, ქალთა საფეხბურთო კლუბ „ბათუმის“ წინააღმდეგ გამართავს. უახლოეს დღეებში კლუბი დამატებით ინფორმაციას გაავრცელებს პროტესტის მიზნების, ხანგრძლივობისა და საკუთარი მოლოდინების შესახებ.