პოლიციამ თბილისში 138 შეკვრა „მეთადონი“ ამოიღო – ერთი პირია დაკავებული

თბილისში სამართალდამცველებმა განსაკუთრებით დიდი ოდენობით ნარკოტიკული საშუალება „მეთადონი“ ამოიღეს. ოპერაციის შედეგად ერთი პირი დააკავეს, რომელსაც ბრალი ნარკოტიკების უკანონო შეძენა-შენახვასა და რეალიზაციის ხელშეწყობაში ედება.

შინაგან საქმეთა სამინისტროს მიერ გავრცელებული ინფორმაციით, თბილისის პოლიციის დეპარტამენტის დიდუბე-ჩუღურეთის მთავარი სამმართველოს თანამშრომლებმა ეჭვმიტანილი სწორედ განსაკუთრებით დიდი ოდენობით ნარკოტიკული საშუალების უკანონო ბრუნვაში მონაწილეობისთვის დააკავეს.

გამოძიების ფარგლებში ჩატარებული საგამოძიებო მოქმედებებისას, მათ შორის დაკავებულის პირადი ჩხრეკის, მისი საცხოვრებელი ბინისა და ავტომობილის დათვალიერების შედეგად, სამართალდამცველებმა სარეალიზაციოდ გამზადებული 138 შეკვრა „მეთადონი“ ნივთმტკიცებად ამოიღეს. ასევე აღმოჩენილია ნარკოტიკული საშუალების დაფასოებისთვის საჭირო მასალები, რაც მის შემდგომ რეალიზაციაზე მიუთითებს.

საქმეზე გამოძიება მიმდინარეობს საქართველოს სისხლის სამართლის კოდექსის 260-ე და 260-ე პრიმა მუხლებით, რაც ითვალისწინებს თავისუფლების აღკვეთას 20 წლამდე ვადით ან უვადოდ.