ელენე ხოშტარია თოდუას კლინიკაში გადაიყვანეს - „დროას“ ლიდერის ჯანმრთელობის მდგომარეობა

პატიმრობაში მყოფი პოლიტიკური პარტია „დროას“ ლიდერი, ელენე ხოშტარია, რუსთავის ქალთა სასჯელაღსრულების დაწესებულებიდან თბილისში, თოდუას კლინიკაში სამედიცინო შემოწმებისთვის გადაიყვანეს.

არსებული ინფორმაციით, მსჯავრდებული პოლიტიკოსი სამედიცინო დაწესებულებაში ეტლით მიიყვანეს დაგეგმილი პროცედურების ჩასატარებლად. მისი ჯანმრთელობის მდგომარეობა სტაბილურად ფასდება, თუმცა სრულ გამოჯანმრთელებაზე საუბარი ამ ეტაპზე ნაადრევია. „დროას“ პრესსამსახურის განმარტებით, ხოშტარიას თვეში ერთხელ სჭირდება კლინიკაში გადაყვანა კონკრეტული პრეპარატის მისაღებად და გეგმური შემოწმების გასავლელად.

ელენე ხოშტარია ჯანმრთელობის გაუარესების გამო რამდენიმე თვის წინ კლინიკა „ვივამედშიც“ იყო გადაყვანილი. იქიდან ის რუსთავის ქალთა ციხეში მიმდინარე წლის 27 სექტემბერს დააბრუნეს.

„დროას“ ლიდერი სამართალდამცველებმა 2025 წლის 15 სექტემბერს დააკავეს. საქმე ეხებოდა თბილისის მერის, კახა კალაძის საარჩევნო ბანერის დაზიანებას, რომელზეც ხოშტარიამ წარწერა „რუსული ოცნება“ დატოვა.

პოლიტიკოსს სასამართლომ აღკვეთის ღონისძიების სახით 5 000 ლარის ოდენობით საპატიმრო გირაო შეუფარდა, თუმცა მან მის გადახდაზე უარი განაცხადა. ბრალი მას სისხლის სამართლის კოდექსის 187-ე მუხლის პირველი ნაწილით წარედგინა, რაც სხვისი ნივთის დაზიანებას გულისხმობს, რამაც მნიშვნელოვანი ზიანი გამოიწვია. მოსამართლე გიორგი არევაძემ ელენე ხოშტარია დამნაშავედ ცნო კალაძის ბანერის დაზიანების საქმეში და მას 1 წლითა და 6 თვით პატიმრობა შეუფარდა.