სტრასბურგმა საქართველოს წინააღმდეგ რელიგიური დისკრიმინაციის საჩივარი დაუშვებლად ცნო
სტრასბურგის სასამართლომ საქართველოს წინააღმდეგ რელიგიური დისკრიმინაციის საჩივარი დაუშვებლად ცნო. საქმე მარნეულის ბიუჯეტიდან ეპარქიის დაფინანსებას ეხებოდა.
ადამიანის უფლებათა ევროპულმა სასამართლომ (სტრასბურგის სასამართლო) დაუშვებლად ცნო საჩივარი, რომელიც საქართველოს წინააღმდეგ „სრულიად საქართველოს მუსლიმთა უმაღლესმა სასულიერო სამმართველომ“ შეიტანა რელიგიური ნიშნით დისკრიმინაციის ბრალდებით. სასამართლომ სრულად გაიზიარა საქართველოს იუსტიციის სამინისტროს წარდგენილი სამართლებრივი პოზიცია და მომჩივნის პრეტენზია აშკარად დაუსაბუთებლად მიიჩნია.
დავის საგანს წარმოადგენდა მარნეულის მუნიციპალიტეტის 2022 წლის ბიუჯეტიდან მარნეულისა და ჰუჯაბის ეპარქიისთვის გამოყოფილი დაფინანსება. მუსლიმთა სასულიერო სამმართველო ამტკიცებდა, რომ ადგილობრივი ბიუჯეტის სახსრების მხოლოდ მართლმადიდებლური ეპარქიისთვის მიმართვა რელიგიურ დისკრიმინაციას წარმოადგენდა.
სტრასბურგის სასამართლოში წარდგენილ არგუმენტაციაში საქართველოს მთავრობა განმარტავდა, რომ მომჩივანი ორგანიზაცია და ეპარქია არ იმყოფებოდნენ შესადარებელ მდგომარეობაში. მთავრობამ ხაზი გაუსვა მართლმადიდებელი ეკლესიის კონსტიტუციითა და კონსტიტუციური შეთანხმებით აღიარებულ განსაკუთრებულ სტატუსს, მის ისტორიულ და კულტურულ როლს, ასევე მრევლისა და რელიგიური ნაგებობების რაოდენობას, რაც, მათი აზრით, სადავო დაფინანსებას არადისკრიმინაციულ ხასიათს ანიჭებდა.
საქმის განხილვისას ევროპულმა სასამართლომ აღნიშნა, რომ მუნიციპალური ბიუჯეტიდან რელიგიური ორგანიზაციების დაფინანსება ადგილობრივი თვითმმართველობების დისკრეციულ უფლებამოსილებას განეკუთვნება. სასამართლომ ყურადღება გაამახვილა იმ ფაქტზე, რომ მარნეულის მუნიციპალიტეტის ტერიტორიაზე კულტურული მემკვიდრეობის სტატუსის მქონე 55 ეკლესია და მონასტერი საქართველოს მართლმადიდებელ ეკლესიას ეკუთვნის და მარნეულისა და ჰუჯაბის ეპარქიის მართვაშია. შესაბამისად, ამ ქრისტიანული კულტურული მემკვიდრეობის მოვლა-პატრონობაზე პასუხისმგებლობა სწორედ ეპარქიას ეკისრება.
სასამართლომ ასევე გაითვალისწინა, რომ მუნიციპალიტეტში კულტურული მემკვიდრეობის სტატუსის მქონე ორი მეჩეთიც არსებობს, თუმცა მომჩივანმა მუსლიმთა სამმართველომ ვერ წარმოადგინა მტკიცებულება, რომ რომელიმე მათგანს ფლობდა, მართავდა ან მის მოვლაზე იყო პასუხისმგებელი. ევროპულმა სასამართლომ გაიზიარა ეროვნული სასამართლოების შეფასება, რომ მომჩივან ორგანიზაციას ამ ობიექტებთან არც სამართლებრივი და არც ფაქტობრივი კავშირი არ გააჩნდა.
ზემოაღნიშნული განსხვავებების საფუძველზე, სტრასბურგის სასამართლომ დაასკვნა, რომ დაფინანსების საკითხთან დაკავშირებით, „სრულიად საქართველოს მუსლიმთა უმაღლესი სასულიერო სამმართველო“ და მარნეულისა და ჰუჯაბის ეპარქია ერთნაირ მდგომარეობაში არ იმყოფებოდნენ. სასამართლოს მოსაზრებით, ამ დასკვნაზე გავლენას არ ახდენდა მუნიციპალიტეტის მოსახლეობის რელიგიური შემადგენლობა ან ის ფაქტი, რომ ორივე ორგანიზაცია რელიგიურ საქმიანობას ეწევა. საბოლოოდ, ადამიანის უფლებათა ევროპულმა სასამართლომ დისკრიმინაციის შესახებ საჩივარი აშკარად დაუსაბუთებლად მიიჩნია და ის დაუშვებლად გამოაცხადა.
SAY.GE · დისკრიმინაცია (სიტყვა) — დეტალები SAY.GE-ზე
