ავიარეისზე არასრულწლოვანზე სექსუალური ძალადობის ბრალდებით საქართველოს მოქალაქე დააკავეს

პოლონეთში, ბარსელონა-მოდლინის ავიარეისზე, 29 წლის საქართველოს მოქალაქე არასრულწლოვანი მგზავრის მიმართ სექსუალური ხასიათის დანაშაულის ჩადენის ბრალდებით დააკავეს. ინფორმაციას ადგილობრივი მედია ავრცელებს.

არსებული ცნობებით, ინციდენტი ფრენის დროს მოხდა. 29 წლის მამაკაცი, რომელიც 16 წლის გოგონას გვერდით იჯდა, მასზე შეხებას შეეცადა. მოზარდმა ყვირილი დაიწყო, რის შემდეგაც მისმა დედამ დაუყოვნებლივ აცნობა მომხდარის შესახებ ბორტის პერსონალს. ეკიპაჟმა სწრაფად იმოქმედა: დააშორა მამაკაცი დაზარალებულს და დაუყოვნებლივ შეატყობინა ფრენების მართვის ცენტრს.

თვითმფრინავის მოდლინის აეროპორტში დაშვებისთანავე, ბორტზე მესაზღვრეები და პოლიციის თანამშრომლები ავიდნენ. მათ ბრალდებული თვითმფრინავიდან გაიყვანეს და დააკავეს.

საქართველოს მოქალაქეს უკვე წაუყენეს ბრალი. დაკავების მომენტში იგი ფხიზელ მდგომარეობაში იმყოფებოდა, თუმცა დანაშაულს არ აღიარებს.