$17-მილიარდიანი შემოსავალი და $23-მილიარდიანი ზარალი – Anthropic-ის IPO-სწინა ფინანსური შედეგები

ფოტო: Getty Images

ხელოვნური ინტელექტის კომპანია Anthropic-ის შემოსავალმა 2026 წლის მესამე კვარტალში თითქმის $17 მილიარდი შეადგინა, რაც გასული წლის ანალოგიურ პერიოდთან შედარებით 1,127%-იანი ზრდაა. ამასთან, კომპანიის მიერ მომავალში გასაწევი ხარჯების ვალდებულებები $895.4 მილიარდს აღწევს, რომელთა უდიდესი ნაწილი გამოთვლით რესურსებსა და ხელოვნური ინტელექტის ინფრასტრუქტურაზე იქნება მიმართული.

განახლებული IPO-სწინა დოკუმენტაციის მიხედვით, მიუხედავად შემოსავლების მკვეთრი ზრდისა, Anthropic-მა მესამე კვარტალში $23.3 მილიარდის წმინდა ზარალი დააფიქსირა. ამავე პერიოდში კომპანიის საოპერაციო ხარჯებმა $17.5 მილიარდი შეადგინა, მაშინ როდესაც მეორე კვარტალში ეს მაჩვენებელი $10.5 მილიარდი, ხოლო 2025 წლის მესამე კვარტალში $4.4 მილიარდი იყო.

მომავალი ხარჯების ვალდებულებების თითქმის $900-მილიარდიანი მოცულობა კომპანიის ფინანსური დოკუმენტაციის ერთ-ერთი ყველაზე მნიშვნელოვანი დეტალია. Anthropic-ის განმარტებით, ამ ვალდებულებების „არსებითად მთელი ნაწილი“ გამოთვლით სიმძლავრეებსა და AI-ინფრასტრუქტურას მოხმარდება.

Anthropic-ის IPO-სწინა დოკუმენტაციაში კომპანიის საბაზრო შეფასება მითითებული არ არის. თუმცა ინვესტორებმა Reuters-ს განუცხადეს, რომ კომპანიის ღირებულებამ შესაძლოა $1.5 ტრილიონს მიაღწიოს. ეს უფრო დაბალი მაჩვენებელია, ვიდრე მანამდე გავრცელებული დაახლოებით $2-ტრილიონიანი შეფასება.

ბოლო ერთი წლის განმავლობაში Anthropic-მა ხელოვნური ინტელექტის მოდელების განვითარებისთვის გამოთვლითი რესურსების უზრუნველსაყოფად რამდენიმე მსხვილ ტექნოლოგიურ კომპანიასთან გააფორმა შეთანხმებები. აპრილში კომპანიამ გარიგებები დადო Amazon-თან, Google-სა და Broadcom-თან, აგვისტოში კი Nvidia-ს მხარდაჭერილ ღრუბლოვანი გამოთვლების პროვაიდერთან $35-მილიარდიანი შეთანხმება გააფორმა.

გასულ კვირას Bloomberg-მა გაავრცელა ინფორმაცია, რომ Anthropic-ი SpaceX-ის უმსხვილესი ცალკეული მომხმარებელია. გამოცემის ცნობით, SpaceX-ის იმ ბიზნესერთეულის შემოსავლის 34.5%, რომელიც სხვა AI-კომპანიებს გამოთვლით რესურსებს აწვდის, ბოლო კვარტალში Anthropic-ზე მოდიოდა.

Anthropic-ის მიერ თითქმის $900-მილიარდიანი ინფრასტრუქტურული ვალდებულებების გამჟღავნების შემდეგ, ორშაბათს აღნიშნული ტექნოლოგიური კომპანიების აქციების ფასიც გაიზარდა. მათ შორის Amazon-ის აქციები 4.8%-ით, SpaceX-ის კი 4.6%-ით იყო მომატებული.

Anthropic-ი, რომელიც 2021 წელს OpenAI-ის ყოფილმა თანამშრომლებმა დააფუძნეს, საზოგადოებრივი სარგებლის კორპორაციის სტატუსით საქმიანობს. კომპანიამ საფონდო ბირჟაზე გასვლისთვის საჭირო IPO-ს განაცხადი გასულ კვირას წარადგინა.

Anthropic-ის ფინანსური დოკუმენტაცია აჩვენებს, რომ ახალი ხელოვნური ინტელექტის მოდელების გამოშვებასთან ერთად კომპანიის შემოსავალი სწრაფად იზრდება, თუმცა პარალელურად მნიშვნელოვნად მატულობს მისი ხარჯებიც და ზარალიც. ამის მიუხედავად, ინვესტორები ვარაუდობენ, რომ Anthropic-ის IPO შესაძლოა ისტორიაში ერთ-ერთი უმსხვილესი გახდეს და ივნისში SpaceX-ის რეკორდულ საჯარო განთავსებასაც გადააჭარბოს. შეგახსენებთ, SpaceX-მა IPO-ს შედეგად $85 მილიარდზე მეტი მოიზიდა.