Apple-მა 2026 წლის IV კვარტალში iPhone-ების გაყიდვებიდან $57.6 მილიარდის შემოსავალი მიიღო

ფოტო: David Paul Morris/Bloomberg

Apple-მა 2026 წლის მეოთხე კვარტალში iPhone-ების გაყიდვებიდან $57.6 მილიარდის შემოსავალი მიიღო, რაც ანალიტიკოსების პროგნოზს აღემატება. ეს ახალი აღმასრულებელი დირექტორის, ჯონ ტერნუსის ხელმძღვანელობის პერიოდში და მსოფლიოს ყველაზე ძვირადღირებული კომპანიის სტატუსის დაბრუნების შემდეგ კომპანიის მიერ გამოქვეყნებული პირველი კვარტალური ფინანსური ანგარიშია.

საანგარიშო პერიოდში Apple-ის მთლიანმა შემოსავალმა $114.5 მილიარდი შეადგინა, რაც ანალიტიკოსების მიერ პროგნოზირებულ $113.4 მილიარდზე მეტია. გასული წლის შესაბამის პერიოდთან შედარებით, კომპანიის შემოსავალი 12%-ით გაიზარდა. ერთ აქციაზე მიღებულმა მოგებამ $2.10 შეადგინა, მაშინ როდესაც უოლ-სტრიტის მოლოდინი $1.99 იყო.

iPhone-ების გაყიდვებიდან მიღებული შემოსავალი, რომელიც ახალი iPhone 18 Pro-ს გაყიდვების პირველ რვა დღესაც მოიცავს, $57.6 მილიარდს გაუტოლდა. ანალიტიკოსების პროგნოზს, $56.6 მილიარდს, ეს მაჩვენებელიც აღემატება.

ფინანსური შედეგების გამოქვეყნების შემდეგ Apple-ის აქციების ფასი ბირჟაზე ვაჭრობის დაწყებამდე 1%-ით შემცირდა. ამასთან, კომპანიის ფასიანი ქაღალდების ღირებულება ძირითადი სავაჭრო სესიის დასრულებისასაც დაახლოებით 1.8%-ით იყო დაკლებული და $338.32-ს შეადგენდა.

შეგახსენებთ, 28 ივლისს Apple-ი გახდა მეორე კომპანია, რომლის საბაზრო კაპიტალიზაციამ $5 ტრილიონს გადააჭარბა. ორშაბათის სავაჭრო სესიის დახურვისას მისი საბაზრო ღირებულება $4.94 ტრილიონს შეადგენდა. ტექნოლოგიურმა გიგანტმა მსოფლიოს ყველაზე ძვირადღირებული კომპანიის სტატუსი პარასკევს Nvidia-სგან დაიბრუნა.

აღსანიშნავია, რომ Apple-ი პირველი კომპანია იყო, რომლის საბაზრო კაპიტალიზაციამ ჯერ $1 ტრილიონს, შემდეგ $2 ტრილიონსა და $3 ტრილიონს მიაღწია. 2025 წლის ივნისიდან, როდესაც Nvidia-მ Microsoft-ს გადაასწრო, უმეტესწილად ის ინარჩუნებდა მსოფლიოს ყველაზე ძვირადღირებული კომპანიის პოზიციას. გამონაკლისი იყო მიმდინარე წლის ივლისში მომხდარი ხანმოკლე ცვლილება და 23 ოქტომბერი, როდესაც Apple-ის დასაკეცი სმარტფონი iPhone Duo გაყიდვაში ჩაეშვა.

ჯონ ტერნუსმა Apple-ის აღმასრულებელი დირექტორის თანამდებობა 1 სექტემბერს დაიკავა და ამ პოზიციაზე ტიმ კუკი შეცვალა, რომელიც კომპანიას თითქმის 15 წლის განმავლობაში ხელმძღვანელობდა.

Apple-ის ფინანსური შედეგები მნიშვნელოვანია მთლიანად ტექნოლოგიური სექტორისთვისაც, რომლის კომპანიებისთვის ოქტომბერი რთული პერიოდი აღმოჩნდა. Alphabet-ისა და Meta-სგან განსხვავებით, რომლებიც ხელოვნური ინტელექტის განვითარებაში მნიშვნელოვან თანხებს ხარჯავენ, Apple-ი კაპიტალურ დანახარჯებს შედარებით დაბალ დონეზე ინარჩუნებს. თუმცა მეხსიერების ჩიპების გაძვირებამ კომპანიის არაერთი პროდუქტის ფასზეც იქონია გავლენა.

Apple-ის ახალი დასაკეცი სმარტფონის, iPhone Duo-ს საწყისი ფასი $1,999-ია. თუმცა მოწყობილობის გაყიდვები კომპანიის 2027 ფისკალური წლის პირველ კვარტალში დაიწყო, შესაბამისად, მისი რეალიზაციიდან მიღებული შემოსავალი 2026 წლის მეოთხე კვარტლის ფინანსურ შედეგებში ასახული არ არის.