Pixel 11 Pro Fold-ის მიმოხილვა - რა მახასიათებლები აქვს Google-ის დასაკეც ტელეფონს | Marketer

Google-ის ახალი დასაკეცი სმარტფონი Pixel 11 Pro Fold წინა მოდელისგან რადიკალურად არ განსხვავდება, თუმცა რამდენიმე მნიშვნელოვანი გაუმჯობესებით გამოირჩევა: მოწყობილობა უფრო მსუბუქია, ეკრანი – კაშკაშა, უსადენო დამუხტვა – გაუმჯობესებული, კამერას კი განახლებული სენსორი აქვს.

Google წელს საკუთარ კონცეფციას არ ღალატობს და ახალი მოდელით გასული წლის მოწყობილობის ნაცნობ დიზაინს ინარჩუნებს. ეს არჩევანი განსაკუთრებით საინტერესოა იმ ფონზე, როდესაც Apple-ის ახალი iPhone Duo და ჩინური ბრენდების ფართო ფორმატის დასაკეცი სმარტფონები ბაზარზე სულ უფრო მეტ ყურადღებას იპყრობს.

Pixel 11 Pro Fold-ის მთავარი უპირატესობა გამძლეობა და Google-ის პროგრამული შესაძლებლობებია. თუმცა, მიმომხილველის შეფასებით, მოწყობილობა შესაძლოა ნაკლებად მიმზიდველი აღმოჩნდეს მათთვის, ვინც პირველ დასაკეც სმარტფონს ყიდულობს.

უფრო მსუბუქი და გამძლე კორპუსი

Pixel 11 Pro Fold გაშლილ მდგომარეობაში 5 მმ სისქისაა, დაკეცილი კი – 10.1 მმ. წინა მოდელთან შედარებით, მოწყობილობა ოდნავ გათხელდა. ასევე, ახალი მოდელი 19 გრამით მსუბუქია. თუმცა, მიმომხილველთა აზრით, ეს განსხვავება ყოველდღიურ გამოყენებაში შესაძლოა შესამჩნევი არ იყოს.

Google-ის განცხადებით, ახალი მოდელის გამძლეობა წინა თაობასთან შედარებით სამჯერ გაიზარდა. მოწყობილობას აქვს მინისა და კერამიკისგან დამზადებული დამცავი საფარი და მინაბოჭკოვანი კომპოზიტის უკანა პანელი, რომელიც დარტყმისგან დაცვას უზრუნველყოფს. 

მტკიცე საკიდი მექანიზმი, რომელიც ტელეფონის დაკეცვა-გაშლას უზრუნველყოფს, ერთი ხელით გახსნას ართულებს. ეს დიზაინის თავისებურებაა და არა ხარვეზი.

გაუმჯობესებულია ეკრანიც: მისი მაქსიმალური სიკაშკაშე 3 600 ნიტს აღწევს, მაშინ როცა წინა მოდელის მაჩვენებელი 3 000 ნიტი იყო. ეს მზიან გარემოში ეკრანის გამოყენებას ამარტივებს. მიუხედავად ამისა, შიდა ეკრანზე დაკეცვის ხაზი კვლავ შესამჩნევია. 

უკანა მხარეს განთავსებულია HiLight-ინდიკატორიც, რომელიც მომხმარებლის მიერ რჩეულ კონტაქტებთან ზარის დროს ან Gemini-ს ხმოვანი რეჟიმით გამოყენებისას ინთება.

პროგრამული შესაძლებლობები და AI

დასაკეცი სმარტფონის ერთ-ერთი მთავარი უპირატესობა დიდ ეკრანზე მუშაობისა და რამდენიმე აპლიკაციის ერთდროულად გამოყენების შესაძლებლობაა. Pixel 11 Pro Fold ამ მხრივ საკმაოდ მოსახერხებელია, თუმცა ეკრანზე გვერდიგვერდ მხოლოდ ორი აპლიკაციის გახსნაა შესაძლებელი.

ზოგიერთი აპლიკაცია დასაკეც ეკრანზე მუშაობისთვის კარგად არის მორგებული. მაგალითად, Gmail-ში შესაძლებელია ერთ მხარეს შემოსული წერილების სიის, მეორე მხარეს კი კონკრეტული წერილის ნახვა. 

საინტერესო ფუნქციაა ე.წ. Bubbles – აპლიკაციების მცურავ ფანჯრებში გახსნა და მათი დავალებების ზოლში მინიმიზაცია. ეს მომხმარებელს საშუალებას აძლევს, კონკრეტული ინფორმაცია სრულ ეკრანზე გადასვლის გარეშე შეამოწმოს.

რაც შეეხება ხელოვნურ ინტელექტს, Google-მა Gemini-ს შესაძლებლობები Magic Cue-ის განვითარებით გააფართოვა. ფუნქცია სხვადასხვა აპლიკაციაში მომხმარებელს შესაბამის მომენტში საჭირო ინფორმაციასა და შეთავაზებებს აწვდის.

კამერა: გაუმჯობესება, თუმცა არა Pro-მოდელის დონეზე

დასაკეცი სმარტფონების კამერები ხშირად ჩამორჩება იმავე სერიის ტრადიციული ფორმატის მოდელებს. Pixel 11 Pro Fold ამ მხრივ გამონაკლისი არ არის. კამერა კარგია, თუმცა Pixel 11 Pro XL-ის შესაძლებლობებს ვერ უტოლდება.

ახალ მოდელში განახლებულია მთავარი 48-მეგაპიქსელიანი სენსორი, რომელსაც მეტი სინათლის მიღება შეუძლია, რაც ფოტოების დეტალიზაციას აუმჯობესებს. ასევე, Super Res Zoom-ის შესაძლებლობა 20-დან 30-გზის გადიდებამდე გაიზარდა.

პროგრამული სიახლეებიდან აღსანიშნავია Looks – ფუნქცია, რომელიც სხვადასხვა წინასწარ განსაზღვრული სტილით ფოტოს ტონს ცვლის. კიდევ ერთი ინსტრუმენტი, Magic Capture, ვიდეოდან საუკეთესო კადრების ავტომატურად შერჩევაში ეხმარება მომხმარებელს. ეს განსაკუთრებით გამოსადეგია ბავშვებისა და შინაური ცხოველების გადაღებისას, როდესაც სასურველი მომენტის დაჭერა რთულია.

ფასი და კონკურენცია

Pixel 11 Pro Fold-ის ფასი აშშ-ში 1 899 დოლარიდან იწყება. ის მხოლოდ 100 დოლარით იაფია ახალ iPhone Duo-ზე და Samsung Galaxy Z Fold 8-ის ფასს უტოლდება. Samsung-ის უფრო დიდი ზომის Z Fold 8 Ultra კი 2 099 დოლარიდან იყიდება.

კონკურენცია კიდევ უფრო გაიზრდება ევროპულ ბაზარზე, სადაც დასაკეცი სმარტფონების გამოშვებას Xiaomi და Honor-იც გეგმავენ.