Euronews: ბიუჯეტზე მოლაპარაკებების ჩაშლის შემდეგ ბელგიის პრემიერი გადადგომას აპირებს

კითხვის სავარაუდო დრო 1 წუთი

ფოტო: REUTERS/Remo Casilli 

Euronews-ის ინფორმაციით, ბელგიის პრემიერ-მინისტრი ბარტ დე ვევერი დღეს მეფე ფილიპეს მთავრობის გადადგომას შესთავაზებს. გადაწყვეტილება მინისტრთა კაბინეტთან ბიუჯეტის საკითხზე გამართული ღამის მოლაპარაკებების უშედეგოდ დასრულებას მოჰყვა.

საზოგადოებრივი მაუწყებლის VRT-ის ცნობით, დე ვევერი მეფესთან აუდიენციას ცენტრალური ევროპის დროით 09:30 საათზე გამართავს.

ბელგიის მთავრობა ევროკავშირის მიერ დაწესებულ საბიუჯეტო ლიმიტებში მოსაქცევად ხარჯების 10 მილიარდი ევროთი შემცირებას გეგმავდა, თუმცა შეთანხმების მიღწევა ვერ მოხერხდა.

გასულ წელს ბელგიის ბიუჯეტის დეფიციტმა მთლიანი შიდა პროდუქტის 5% შეადგინა, მაშინ როდესაც ევროკავშირის ფისკალური წესებით, დასაშვები მაქსიმალური მაჩვენებელი 3%-ია. ქვეყნის სახელმწიფო ვალი 735 მილიარდ ევროს აღემატება, რაც მშპ-ის 110%-ზე მეტია. ევროკავშირის მიერ დადგენილი ზღვარი კი მშპ-ის 60%-ს შეადგენს.

ბიუჯეტზე შეთანხმების ჩაშლას ბელგიის სახელმწიფო ობლიგაციებზე საპროცენტო განაკვეთების ზრდა მოჰყვა, რაც ქვეყნისთვის ვალის მომსახურებას აძვირებს.

თუ მეფე ფილიპე პრემიერ-მინისტრის გადადგომას მიიღებს, ქვეყანაში ვადამდელი საპარლამენტო არჩევნები დაინიშნება. თუმცა მონარქს ასევე შეუძლია, უარი თქვას გადადგომის მიღებაზე ან გადაწყვეტილება დროებით გადადოს.