ენერგეტიკოსი: „გაზის ტარიფი გაძვირების ნაცვლად, უნდა გაიაფდეს“ – ექსპერტი დიფერენცირებულ მიდგომას აკრიტიკებს

ცნობილი ენერგეტიკოსი თემურ ჭიჭინაძე მიიჩნევს, რომ ბუნებრივი გაზის ტარიფები, მოხმარების ზრდის მიუხედავად, არ უნდა გაძვირდეს, პირიქით, მისი გაიაფების რესურსი არსებობს. ამის შესახებ მან „ბიზნესპრესნიუსთან“ საუბრისას განაცხადა, სადაც პარლამენტის მიერ დაჩქარებული წესით მიღებული ცვლილებები შეაფასა.

საქართველოს პარლამენტმა ახლახან მიიღო კანონში ცვლილებები, რომლის თანახმად, სემეკს (საქართველოს ენერგეტიკისა და წყალმომარაგების მარეგულირებელი ეროვნული კომისია) უფლება ენიჭება, საყოფაცხოვრებო მომხმარებლებისთვის წყლისა და ბუნებრივი გაზის მოცულობის მიხედვით დიფერენცირებული ტარიფები დაადგინოს. თემურ ჭიჭინაძის აზრით, ეს მიდგომა არასწორია.

„ვერ ვხვდები მოხმარების ზრდის გამო ტარიფის გაზრდის ლოგიკას“, – აღნიშნავს ენერგეტიკოსი. მისი განმარტებით, მეტი რესურსის მოხმარება ავტომატურად არ ნიშნავს, რომ მომხმარებელს უკეთესი სოციალური მდგომარეობა აქვს. ის მაგალითად სავაჭრო სფეროს იშველიებს, სადაც ხშირად რაც მეტს ყიდულობ, მით ნაკლებს იხდი, გაზის შემთხვევაში კი საპირისპირო პრინციპის დანერგვა იგეგმება.

ჭიჭინაძე ხაზგასმით აღნიშნავს, რომ სოციალურად დაუცველი მოქალაქეებისთვის გადასახადის შემცირება მისაღებია, თუმცა, დაუშვებელია ტარიფის გაძვირება მათთვის, ვინც მეტს მოიხმარს. „მათ შევუმციროთ გადასახადი, მაგრამ სხვებს ნუ გაუძვირებთ. ეს აუცილებელი არ არის“, – აცხადებს ის.

ექსპერტი განმარტავს, რომ მოხმარების მოცულობის მიხედვით ტარიფის განსაზღვრა არ ითვალისწინებს იმ რეალობას, რომ მომხმარებელს შესაძლოა მეტი გაზი საცხოვრებელი პირობებიდან გამომდინარე სჭირდებოდეს და არა ფინანსური შესაძლებლობების გამო. მაგალითად, დიდ სახლში მცხოვრებ პირს, რომელიც შესაძლოა მემკვიდრეობით ერგო, გათბობისთვის ბუნებრივი აირის მეტი მოცულობა ესაჭიროება. ასეთ შემთხვევაში, მისი აზრით, ტარიფის გაზრდა უსამართლო იქნება.

რაც შეეხება ტარიფის შემცირების რესურსს, თემურ ჭიჭინაძე ყურადღებას გაზმომარაგების პროცესში არსებულ შუამავალ კომპანიებზე ამახვილებს. მისი თქმით, საქართველოს საზღვრიდან მომხმარებლამდე გაზის მიწოდებაში სამი აზერბაიჯანული შუამავალი კომპანია მონაწილეობს. მათი საქმიანობისა და როლის გადახედვამ, ენერგეტიკოსის შეფასებით, შესაძლოა მნიშვნელოვანი ფინანსური რესურსი დაზოგოს და გაზის გაიაფება მოიტანოს.

წყალმომარაგების სფეროში დიფერენცირებული ტარიფების დაწესებაც კითხვებს ბადებს, განსაკუთრებით იმ ფონზე, როცა მოსახლეობის დიდი ნაწილი გამრიცხველიანებული არ არის და სულადობრივ გადასახადს იხდის. გარდა ამისა, ექსპერტი შიშობს, რომ წყლისა და გაზის ტარიფების ზრდა წარმოებებზეც აისახება, რაც საბოლოოდ პროდუქციის გაძვირებას და მოსახლეობისთვის დამატებით ტვირთს გამოიწვევს.

„გაზს იმდენი რესურსი აქვს, რომ გაძვირების ნაცვლად, საერთოდ უნდა გაიაფდეს“, – ასკვნის თემურ ჭიჭინაძე.