ტელეფონის ცუდი ჩვევებისთვის OSSA-მ „აღსარების კაბინები“ მოაწყო

ყოფილის პროფილის გამუდმებით შემოწმება, უპასუხოდ დატოვებული შეტყობინებები, უსასრულო ხმოვანი ჩანაწერები თუ ზედმეტი ონლაინშოპინგი: Uncommon Creative Studio-მ და ტელეფონის აქსესუარების ბრენდმა OSSA-მ ნიუ-იორკელებს ამ ჩვევების საჯაროდ აღიარების შესაძლებლობა მისცეს. სოჰოში, მერსერის ქუჩაზე, მათ აღსარების კაბინები მოაწყვეს, სადაც მონაწილეებს საკუთარი „ციფრული ცოდვების“ მოსაყოლად 45 წამი ჰქონდათ. სანაცვლოდ კი შეზღუდული რაოდენობით გამოშვებულ „Rossary“-ს, ტელეფონის საკიდ ჯაჭვს იღებდნენ.

აქტივაციის იდეა სმარტფონებთან წინააღმდეგობრივ ურთიერთობას ეფუძნება. ტელეფონი ერთდროულად ჩვენი მეგზური, დღიური, საკომუნიკაციო საშუალება და პირადი ინფორმაციის საცავია. ამავე დროს, ხშირად გვაწუხებს ისიც, რამდენ დროს ვუთმობთ და რამდენი რამ იცის ჩვენ შესახებ. Uncommon-ის კრეატიული პარტნიორის, ბენ გოლიკის თქმით, OSSA-ს პროდუქტი ამ პარადოქსს პირდაპირ გამოხატავს: გვინდა, ტელეფონი გვერდზე გადავდოთ, თუმცა აქსესუარით საკუთარ სხეულზე ვიმაგრებთ.

კამპანიის გზავნილიც ამ თვითირონიას მიჰყვება: „მომიტევე, მამაო, რადგან ვსქროლავდი“. მონაწილეებს შეეძლოთ მოეყოლათ იმ ჩვევებზე, რომლებსაც ყოველდღიურად იმეორებენ და რომელთა აღიარებაც ცოტა უხერხულია. Uncommon-ის მომხმარებლის გამოცდილების მიმართულების პრეზიდენტი კრის გიბონსი ასეთ მაგალითებს შორის ასახელებს ადამიანთან კომუნიკაციის ახსნის გარეშე გაწყვეტას, ყოფილი პარტნიორის ონლაინთვალთვალს, ზედმეტად გრძელ ხმოვან შეტყობინებებსა და საკვების მიტანის სერვისებით გადაჭარბებულ სარგებლობას. აქტივაცია ამ ყველაფრის იუმორით დანახვასა და გაზიარებას სთავაზობდა გამვლელებს.

პროექტზე მუშაობისას გუნდმა OSSA-ს მომხმარებლების კიდევ ერთ ჩვევას მიაქცია ყურადღება: ზოგიერთი მათგანი ტელეფონის საკიდის მძივებს თითებში ატრიალებს. ამ ქცევის შესასწავლად შემქმნელები ფსიქოლოგების, სტივენ და რეიჩელ კაპლანების ნაშრომებს გაეცნენ, კერძოდ, ყურადღების ძალდაუტანებლად მიპყრობის კონცეფციას, რომელსაც „soft fascination“ ეწოდება.

კრის გიბონსს ამის მაგალითად ხელში გლუვი კენჭის ტრიალი მოჰყავს. მისი განმარტებით, ასეთი მოქმედება ყურადღებას მსუბუქად იკავებს და გონებას დასვენების საშუალებას უტოვებს. OSSA-ს საკიდები თავდაპირველად ამ მიზნით არ შექმნილა, თუმცა მომხმარებლების გამოცდილებამ გუნდს უბიძგა, ახალ პროდუქტებში შეხების შეგრძნებისთვის მეტი მნიშვნელობა მიენიჭებინა. ეს იდეა კამპანიის საფუძვლის ნაწილი გახდა; თავად აქსესუარის ფსიქოლოგიური ეფექტი პროექტის ფარგლებში დადასტურებულ შედეგად არ არის წარმოდგენილი.

ნიუ-იორკში დაბადებული ბრენდისთვის ქუჩაში გასვლა ადგილობრივ აუდიტორიასთან ურთიერთობის გაგრძელებაც იყო. მერსერის ქუჩაზე მოწყობილ კაბინებს ქალაქში გაკრული პოსტერები და მანჰეტენის ცენტრში მდებარე ეკლესიაზე პროეცირებული სარეკლამო ვიზუალები დაემატა. იდეის წარდგენიდან მის განხორციელებამდე რვა კვირა გავიდა.